हामी सबैले बुझ्नुपर्ने कुरा मण्डली वा चर्च वा गिर्जा के हो त ? किन सबैलाई यसको मोह ? लेखक- रेभ डा बाल कृष्ण शर्मा
मण्डली वा चर्चको अवधारणालाई हामीले परमेश्वरको वचन बाइबलबाट बुझ्नु आवश्यक छ । आज मण्डली वा चर्चका बारेमा आ-आफ्ना किसिमका बुझाइहरू छन् र गलत किसिमका बुझाइले असमझदारी सृजना गर्छ र मण्डली वा चर्चको महत्वलाई गौण बनाइदिन्छ । आज म यस लेख मार्फत मण्डली के हो भन्ने बारेमा बुझाउने कोशिश गर्छु र येशू ख्रीष्टलाई प्रभु र मुक्तिदाताका रूपमा स्वीकार गरेकाहरू र अझै उहाँलाई स्वीकार गर्न बाँकी रहेकाहरू सबैका लागि यो सहयोगी बन्न पुग्नेछ भनी मैले आशा लिएको छु । मेरो यो सानो प्रयासलाई सकारात्मक रूपमा बुझिदिनका लागि पनि म अनुरोध गर्न चाहन्छु ।
नेपाली भाषामा प्रयोग गरिएको मण्डली र अंग्रेजी भाषामा प्रयोग गरिएको चर्च शब्द ग्रीक भाषाको एकलेसिया शब्दबाट आएको हो जसको अर्थ संसारबाट परमेश्वरको निम्ति अलग गरिएका व्यक्तिहरू भन्ने हुन्छ । बाइबलको शिक्षाअनुसार एकजना व्यक्ति पनि ख्रीष्टको चर्च वा मण्डली हो । यसको अर्थ व्यक्ति वा व्यक्तिहरू पापपूर्ण संसारका गलत मूल्य र मान्यताबाट अगल भई बाइबलीय मूल्य र मान्यता राख्नेहरू भन्ने बुझिनुपर्छ । संसारबाट अलग हुनु भनेको यस संसारमा नै नबस्नु भन्ने हुँदैन तर यस संसारमा चालिएका गलत मूल्य र मान्यतालाई अस्वीकार गरी परमेश्वरको वचनको निर्देशनअनुसार चल्नु हो । यो स्थान परिवर्तनभन्दा पनि जीवन परिवर्तनसँग समबन्धित छ । संसारको मूल्य र मान्यता भन्नाले अरूहरूमाथि गरिने अपमान, अमानवीय व्यवहार, अन्याय, अत्याचार, भ्रष्टाचार, शोषण, घमण्ड, डाहा, हिँसा, हत्या, शारीरिक अभिलाषा र व्यभिचार, पियक्कडपन र यस्तै शारीरिक अभिलाषाका कुराहरू हुन् । संसारबाट अलग हुनु भनेको यी कुराहरूबाट अलग भएर रहनु हो । यी खराब कुराहरूबाट अलग भएर रहनका लागि पनि हामीलाई परमेश्वर येशू ख्रीष्टको अनुग्रह र सामर्थ्य चाहिन्छ । संसारसँग एकै चालका नहोओ तर तिमीहरूको मनको परिवर्तनले नयाँ होओ भनी बाइबलमा आग्रह गरिएको छ । चर्च वा मण्डलीलाई यस दृष्टिकोणबाट बुझिदिनका लागि म आग्रह गर्दछु किनकि यथार्थ यही हो र चर्चको बारेमा गल्ती कुराहरू गरी भ्रमाउने कोशिश भएकोमा म अति नै दुःखी छु । हामीले अरूहरूलाई भ्रममा पार्नु पनि संसारको स्वभाव हामीमा रहनु हो । चर्च वा मण्डली भनेको येशू ख्रीष्टको शरीर हो जसमा पवित्र आत्माको उपस्थिति हुन्छ र प्रत्येक व्यक्तिलाई पवित्र आत्मा वास गर्नुहुने मन्दिर भनिएको छ । कुनै ख्रीष्टियानले अपवित्र कार्य गर्यो भने त्यसको आधारमा बाइबल र यसको पवित्र शिक्षामाथि आक्रमण गर्नु अन्याय हुनजान्छ । गलत गर्ने व्यक्तिहरू सबै धर्ममा र धर्म नै नमान्ने समाजमा हुन्छन् । कुनै पनि आस्थालाई व्याख्या गर्नका लागि त्यसको धर्मशास्त्रको गहिरो अध्ययन गरिनुपर्छ र सतही भएर कसैमाथि पनि आक्षेप लगाउनु हुँदैन । कसैमाथि आक्रोशित हुन आवश्यक नै छैन । मानव जातिको अन्तिम फैसला जीवित परमेश्वरले नै गरिदिनुहुन्छ र जीवित परमेश्वरका सामु सबैले आफ्नो हिसाब दिनुपर्छ ।
बाइबलमा दुई किसिमका मण्डली वा चर्चको अवधारणालाई व्यक्त गरिएको छ । विश्वव्यापी मण्डली वा चर्च र स्थानीय मण्डली वा चर्च । एक व्यक्तिले प्रभु येशू ख्रीष्टलाई आफ्ना प्रभु र मुक्तिदाताका रूपमा स्वीकार गरेपछि त्यही क्षणबाट नै एक व्यक्ति विश्वव्यापी मण्डलीको सदस्य भएको हुन्छ र यो अदृश्य सदस्यता हो र यसको आधार भनेको येशूको धार्मिकतालाई स्वीकार गरी उहाँका सन्तान बन्नु हो । यस अर्थमा हरेक व्यक्ति चर्च वा मण्डली हो । मण्डली वा चर्च भनेको कुनै भौतिक भवन होइन मण्डली भनेको त पवित्र आत्माद्वारा नयाँ जन्म पाएको मानव हो । यसैले एक व्यक्तिको विश्वासको आधारमा र उसले ख्रीष्टसँग निर्माण गरेको सम्बन्धको आधारमा एक व्यक्ति मण्डली बन्छ । विश्वव्यापी मण्डली भएको व्यक्ति स्थानीय मण्डलीको सदस्य हुनैपर्छ किनकि उसको विश्वासको अभ्यास गर्ने, आफ्ना वरदानहरू अभ्यास गर्ने, परमेश्वरको वचन सुन्ने , अरूहरूसँग संगति गर्ने र आत्मिक रूपमा वृद्धि हुँदै जाने स्थान मण्डली भवन हो । मण्डली भवनमा सामुहिक आराधना हुन्छ । वचनको प्रचार हुन्छ । अगमवाणी हुन्छ । सामुहिक प्रार्थना हुन्छ । आत्मिक वरदाहरूको प्रयोग हुन्छ । सामुहिक उत्साहा हुन्छ । सामुहिक रूपमा ख्रीष्टको महान आदेशलाई पूरा गर्न सकिन्छ । यसैले विश्वव्यापी मण्डलीको सदस्य भएको व्यक्ति स्थानीय मण्डलीको सदस्य हुनैपर्छ तर विश्वव्यापी मण्डलीको सदस्य नभएको व्यक्ति पनि स्थानीय मण्डलीको सदस्य हुनसक्छ तर त्यसलेचाहिँ उद्धार पाएको हुँदैन । जबसम्म एक व्यक्तिले ख्रीष्टलाई आफ्ना मुक्तिदाता र प्रभुको रूपमा स्वीकार गर्दैन ऊ स्थानीय मण्डलीको सदस्य भए पनि विश्वव्यापी मण्डलीको सदस्य हुन सक्दैन । आज मण्डली भवनमा आउने कोही व्यक्तिहरू यस्ता पनि हुनसक्छन् । हरेक व्यक्तिले आफू विश्वव्यापी मण्डलीको सदस्य भएको छु वा छैन भन्ने बारेमा आफैलाई परमेश्वरको वचन अनुसार जाँच्नुपर्छ ।
आज नेपाल लगायत अन्य देशहरूमा शुरू भएका मण्डली वा चर्चहरूका बारेमा मानिसहरूमा धेरै प्रश्नहरू छन् । कति ठूलो भएपछि मण्डली हुन्छ त ? मण्डली हुनका लागि कति जना चाहिन्छ ? बाइबलले यस विषमा केही बताएको छ । येशूले भन्नुभयो कि दुई वा तीन जना जब मेरो नाउँमा भेला हुन्छन् म तिनीहरूका बीचमा हुनेछु । यहाँ येशूले सबैभन्दा सानो सामुहिक भेलालाई सम्बोधन गर्नुभएको छ । संख्यामा मण्डली सानो वा ठूलो हुनसक्छ तर मण्डली भेलाको उद्देश्य ख्रीष्टद्वारा पवित्र आत्मामा परमेश्वरको महिमा गर्नु हो । मण्डली एक परिवार भएको हुनाले यहाँ परमेश्वरलाई प्रशंसा गर्नुका साथसाथै एक अर्काप्रति सरोकार देखाइन्छ । एक अर्कालाई मद्दत गरिन्छ किनकि यो परिवार हो । यो केवल आत्मिक परिवार मात्र होइन यो भौतिक र सामाजिक कुराहरूलाई बाँडचुँड गर्ने परिवार हो । यहाँ एक अर्कालाई सहयोग गरिन्छ किनिक यो परिवार हो । यहाँ आनन्द र रोदन, खुशी र पीडा, सफलता र असफलता बाँडचूँड गरिन्छ । यहाँ एक अर्कालाई सम्मान र आदर गरिन्छ र सबै मानवप्राणी परमेश्वरको स्वरूपमा सृष्टि गरिएको हो भनी शिक्षा दिनुको साथै अभ्यास गरिन्छ । येशू ख्रीष्टमाथि विश्वास गरेका हजारौँ व्यक्तिहरूलाई सोधनी गर्दा पनि यो सत्यता प्रमाणित हुन्छ । मण्डली वा चर्च भवन धार्मिक स्थल हुनुको साथसाथै यो सामाजिक र सरोकार राख्ने थलो पनि भएको हुनाले यस अर्थमा यसलाई बुझिनुपर्छ । यो संख्यामा अति सानो वा ठूलो हुनसक्छ । धेरै चर्च वा मण्डलीहरू भए भनेर गुनासो गर्नु आवश्यक छैन । कुनै परिवार ठूला हुन्छन् र कुनै परिवार साना हुन्छन् । सानो र ठूलोभन्दा पनि मण्डलीमा परमेश्वरको उपस्थिति, ठीक किसिमको शिक्षा, मेलमिलाप र ख्रीष्टलाई अभिव्यक्त गर्ने चरित्र हुनुपर्छ । यसैले चर्च वा मण्डलीलाई गलत किसिमले बुझ्नुभएको छ भने आफ्नो सोचलाई सच्याउनुहोस् । तपाईंको ठीक सोचमा परमेश्वरको आशिष पर्नेछ । मेरो प्रार्थना यही छ कि चर्च वा मण्डलीलाई आन्तरिक रूपमा बलियो बनाऔँ र परमेश्वरको प्रेम र शान्तिको राज्यलाई सबैकहाँ पुर्याउने जिम्मेवारीमा प्रार्थनासाथ लागिपरौँ । परमेश्वरले हामी सबैलाई आशिष दिनुभएको होस् ।
